A LIMIA SERÁ O LUGAR DA 46 EDICIÓN DA ROMAXE ORGANIZADA POLA ASOCIACIÓN IRIMIA

O sábado 14 de setembro a Asociación Irimia organiza a XLVI Romaxe de crentes galegas e galegos.

O programa comezará ás 11.00 cunha acollida e petiscos. Ao mediodía, 12h, será a celebración acompañada pola música do grupo A Quella. Logo habera un xantar compartido, animando a sobremesa cunha foliada e distintas actuacións musicais, ata que ás 18.00 sexa a clausura do acto.

A organización recorda que se o tempo non é favorable, os actos serán no pavillón polideportivo.

Dende a primeira Romaxe de crentes galegas e galegos, Irimia sempre reivindicou e denunciou as situacións sociais que se dan no país, así como apoiou e puxo en valor as pingas de choiva que en cada lugar coidan da Terra. Este ano quere facer fincapé nun pensamento coidadoso: non decidir nunca polos demais. A comunidade ao servizo da comunidade. Apoiando iniciativas de axuda mutua entre a veciñanza. O coidarme, coidarte, coidarnos como xeito de ser e estar no noso medio.

A primeira Romaxe naceu a carón do Pedregal de Irimia, e foi percorrendo diferentes lugares de Galicia. Dende entón, a Asociación Irimia camiña participando en iniciativas a prol do noso país, así como editando unha revista dispoñible online (www.irimia.gal). A Romaxe de Crentes Galegos reúne cada ano a centos de persoas nunha singular romaría itinerante.

Únete a nós e convida a túa contorna!